TSV Blauen

1949

Aktuelles

GLZ 2015 Weiningen Bericht


Die aktive Turnerinne mit dr Gymnastik und s 35+ mitem Fachtest Allround hei kurz nachem Mittag dr Wettkampf für dr TSV Blauen eröffnet. Eusi Frauä hei mit ihrer Gymnastik eimol mehr s Publikum chönne begeistere und sogar de Zürcher es lächle ins Gsicht zaubäräJ. S Ergäbnis vo dr Gymnastik isch den au dementsprechend super usgfalle. Si hei e Note vo 9.55 erzielt und somit neue Vereinsrekord bi närä Gymnastik ufgstellt. Zytglich het s 35+ bim Allround mitere glanz Leistig chönne Zuschauer vo ihrnä Fähigkeite überzüge. Mit Gschicklichkeit, Usdur und Siegeswillä hei si ebäfalls e Note vo 9.55 erreicht.


Nach dem sensationelle Uftakt an dem Turnfest isches den direkt witer gange mit em Hochsprung und em Kugälästossä. Kurz nach dä eins het dr Wettkampf somit au für die restliche Aktive Turner agfange. Unter nid ganz eifachä Bedingigä bi mittlerwile 35°C sind d Resultat in denä zwei Disziplinä trotzdem guet usgfalle. Im Hochsprung hets für ä 9.34 und im Kugele für ä 8.81 glängt. Zfridä und zuäversichtlich sind mir den am zwei z Zmitag zu unserä letztä Diszipline gstartä. Zytglich mitem Fachtest Allround het au no dr Witsprung stattgfunde. Dr Fachtest isch wie scho bim 35+ super gloffä und au im Witsprung hets tolli Resultat geh und einige neui persönlichi Bestleistigä. D Freud isch riesig gsi wo mir schliesslich au no die letzte Resultat vernoh hei. Im Fachtest es 9.27 und im Witsprung mitemenä glatte 10.00 hei mir de super tolli Anlass us sportlicher Sicht sehr positiv chönne beende. Obwohl dr sportlichi Teil vom Turnfest eigentlich verbi gsi isch, hei es paar verruckti Blauner immer nonig gnue gha. Ufem Festgländ hets e Bobschlitte gha, wo me in möglischt kurzer Zyt het miessä vom Start ins Ziel stossä. Ergizig wie d Blauner halt sind, isch de Bob so vil mol agstossä wordä, bis mir in allnä Kategorie (Männer, Frauen, Mixed) dr Rekord gha hei. Typisch Blaue!!!


Nach dem witere Erfolg isch den aber würklich für alli Turner gnuäg Sport gsi und so hei mir eus nach ärä kaltä Duschi und es paar Bier bim Zeltplatz troffä. Dört acho isch bereits dr nächsti Höhepunkt uf eus zuä cho. Dr Silvan Holzherr isch nämlich an dem Tag 30 Joor jung wordä und das händ mir anschliessend mitemenä Überraschigs-Apéro gfiirt. Bi dem heisse Summertag sind die 6 Fläsche Champagner schnell leer gsi. Nachem Apéro isch langsam aber sicher bi allnä Blauner Feststimmig ufcho und so sind mir alli zämme ins Festzelt gangä go Znacht esse. Unterwegs zum Festzält sind mir näbe dr Resultatwand verbi gloffä und hei mit Freud dörfä gseh, das die Aktive im 3-teiligä Vereinswettkampf in dr 4 Stärkeklass e super guti Gesamtnote vo 27.58 erreicht hei und uf em 4. Platz vo insgesamt 37 Teilnehmer sind. No die grösseri Überraschig het jedoch s 35+ dörfä erläbä denn im 1-teilige Vereinswettkampf sind sie zu dem Zytpunkt no ganz obe an dr Wand ghangä. Es sind aber nonig alli Resultat usgwärtet gsi. Bi jeder Aenderig an dr Wand het me entwäder dr Sascha, dr Markus, dr Fabian, s Nicole, s Esther oder s Daniela gseh ufspringe und go luege, ob sich öbis gänderet het. Es isch e richtigi Geduldsprob wordä. Umso grösser isch den d Erlichterig gsi,  wo sie endlich erfahrä händ, das alli Resultat dussä sind und sie tatsächlich Turnfestsieger worde sind in ihrer Kategorie. Bravo Bravo Bravo!!!


Nach denä super Neuigkeite isch den dr Obä au dementsprechend super, genial, toll und durstig usgfallä. Dr eint oder ander het das sogar am nächschte Morgä no gspürt.


Am Sunntig Nomitag am zwei isch es den soweit gsi und d Rangverkündigung isch bevorgstandä. Mit grosser Freud het dr TSV Blaue dörfä am 35+ zuäjublä, wo si dr goldig Kranz entgegägnoh hei.


S ganze Turnfest isch eimol mehr e Beweis gsi das dr TSV Blauen e super tolle und vorallem au erfolgrichä Verein isch.


Sandy Sprunger


Ahmerkig: Mi weiss jo wer d Uffgab vom Bricht schriibä fasst....